ಶ್ರೀ ಜಗದ್ಗುರು ರೇಣುಕಾಚಾರ್ಯ ವಿದ್ಯಾಸಂಸ್ಥೆ 75 ವರ್ಷಗಳನ್ನು ಪೂರೈಸಿದ ವರ್ಷದಲ್ಲಿದೆ. ಇದರ ಅಂಗಸಂಸ್ಥೆಯಾದ ಎಸ್.ಜೆ. ಆರ್.‌ ಮಹಿಳಾ ಕಾಲೇಜು ಸ್ಥಾಪನೆಗೊಂಡು ಈಗ 30 ವರ್ಷಗಳಿಗೆ ಕಾಲಿಟ್ಟಿದೆ. ಇಲ್ಲಿ ಪದವಿ ಪಡೆದ ಸಾವಿರಾರು ವಿದ್ಯಾರ್ಥಿನಿಯರು ಪ್ರಪಂಚದ ಮೂಲೆ ಮೂಲೆಗಳಲ್ಲಿ ಹಲವು ಕ್ಷೇತ್ರಗಳಲ್ಲಿ ಕಾರ್ಯ ನಿರ್ವಹಿಸುತ್ತಿರುವುದು ವಿದ್ಯಾಲಯಕ್ಕೆ ಹೆಮ್ಮೆಯ ಸಂಗತಿ. ಆ ವಿದ್ಯಾರ್ಥಿನಿಯರು ಹಳೆಯ ವಿದ್ಯಾರ್ಥಿನಿಯರ ಸಂಘ “ಅನುಬಂಧ”ದೊಡನೆ ಕಾಲೇಜಿನ ಸಂಪರ್ಕದಲ್ಲಿ ಇದ್ದಾರೆ. ನಮ್ಮ ವಿದ್ಯಾರ್ಥಿನಿಯರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಅನೇಕ ಬಹುಮಾನಗಳನ್ನು ಪ್ರತಿವರ್ಷ ಪಠ್ಯೇತರ ಚಟುವಟಿಕೆಗಳಲ್ಲಿ ಪಡೆಯುತ್ತಿರುವುದು. ರಾಷ್ಟ್ರೀಯ ಮಟ್ಟದ ವಿಚಾರ ಸಂಕಿರಣಗಳಲ್ಲಿ ಭಾಗವಹಿಸುವುದು, ವಿಶ್ವವಿದ್ಯಾಲಯದ ಪರೀಕ್ಷೆಯಲ್ಲಿ ಪ್ರತೀ ವರ್ಷ ಶೇ.90ಕ್ಕೂ ಹೆಚ್ಚು ಫಲಿತಾಂಶಗಳನ್ನು ಪಡೆದು ತೇರ್ಗಡೆ ಹೊಂದುವುದರ ಜೊತೆಗೆ ಹಲವು ವಿಷಯಗಳಲ್ಲಿ ಶೇ.100 ಅಂಕಗಳನ್ನು ಪಡೆದಿರುವ ನೂರಾರು ವಿದ್ಯಾರ್ಥಿನಿಯರು ಇದ್ದಾರೆ. ಈವರೆಗಿನ ಬೆಂಗಳೂರು ವಿಶ್ವವಿದ್ಯಾಲಯದ ಪರೀಕ್ಷೆಯಲ್ಲಿ ನಮ್ಮ ಕಾಲೇಜಿಗೆ ನಾಲ್ಕು ರಾಂಕ್ ಗಳು ಮತ್ತು ಹಲವು ಚಿನ್ನದ ಪದಕಗಳನ್ನು ನಮ್ಮ ವಿದ್ಯಾರ್ಥಿನಿಯರು ಪಡೆದಿದ್ದಾರೆ. ಪ್ರತೀವರ್ಷ ಕ್ಯಾಂಪಸ್‌ ಆಯ್ಕೆಯಲ್ಲಿ ನೂರಕ್ಕೂ ಹೆಚ್ಚು ವಿದ್ಯಾರ್ಥಿನಿಯರು ಇನ್ಫೋಸಿಸ್‌, ವಿಪ್ರೋ ಮತ್ತು ಐಬಿಎಂ, ಅಕ್ಸೆಂಚರ್‌ ಮುಂತಾದ ಕಂಪನಿಗಳಿಗೆ ಆಯ್ಕೆಯಾಗುತ್ತಿರುತ್ತಾರೆ. ಸಾಂಸ್ಕೃತಿಕ ವೇದಿಕೆಯಿಂದ ವರ್ಷವಿಡೀ ವೈವಿಧ್ಯಮಯ ಕಾರ್ಯಕ್ರಮಗಳನ್ನು ಹೆಣ್ಣು ಮಕ್ಕಳ ಪ್ರತಿಭೆಗೆ ಪ್ರೋತ್ಸಾಹ ನೀಡಲು ಆಯೋಜಿಸಲಾಗುತ್ತದೆ. ನೃತ್ಯ, ಗಾಯನ, ರಂಗೋಲಿ, ಕಂಸಾಳೆ, ವೀರಗಾಸೆ, ಮೆಹಂದಿ, ಮೇಕಪ್‌ ಮತ್ತು ಹೇರ್‌ ಸ್ಟೈಲ್‌ ಇತ್ಯಾದಿ ಸ್ಪರ್ಧೆಗಳಲ್ಲಿ ಅಂತರ ಕಾಲೇಜು ಮಟ್ಟದಲ್ಲಿ ಬಹುಮಾನ ವಿಜೇತರಾಗಿ ನಮ್ಮ ವಿದ್ಯಾರ್ಥಿನಿಯರು ಕಾಲೇಜಿಗೆ ಮೆರುಗು ನೀಡುತ್ತಾ ಬರುತ್ತಿದ್ದಾರೆ. ಕಲಾ, ವಾಣಿಜ್ಯ ಮತ್ತು ಮ್ಯಾನೇಜ್ ಮೆಂಟ್‌ ವಿಭಾಗ ಮತ್ತು ವಿಜ್ಞಾನ ವಿಭಾಗಗಳು ಆಯಾ ವಿಭಾಗಕ್ಕೆ ತಕ್ಕಂತೆ ಗೋಷ್ಠಿ ವಿಚಾರ ಸಂಕಿರಣಗಳನ್ನು ಕಾಲಕಾಲಕ್ಕೆ ಆಯೋಜಿಸಿ ವಿದ್ಯಾರ್ಥಿನಿಯರ ಮಾನಸಿಕ ಬೆಳವಣಿಗೆಗೆ ಬೇಕಾದ ಎಲ್ಲಾ ಆದ್ಯತೆಗಳನ್ನು ನೀಡುತ್ತಾ ಬರುತ್ತಿದ್ದಾರೆ. ನುರಿತ ಪ್ರತಿಭಾವಂತ ಹಿರಿಯ ಬೋಧಕ ವೃಂದ ನಮ್ಮ ವಿದ್ಯಾಲಯದ ಹಿರಿಮೆಗಳಲ್ಲಿ ಒಂದು. ವಿದ್ಯಾರ್ಥಿನಿಯರ ಸರ್ವತೋಮುಖ ಬೆಳವಣಿಗೆಗೆ ಬೇಕಾದ ವಿಶಾಲವಾದ ಸಭಾಂಗಣ, ವಾಚನಾಲಯ, ಗ್ರಂಥಾಲಯ, ಒಳ ಮತ್ತು ಹೊರಾಂಗಣ ಕ್ರೀಡಾ ಸೌಲಭ್ಯ, ಥ್ರೋಬಾಲ್‌, ವಾಲಿಬಾಲ್‌, ಖೋಖೋ ಕ್ರೀಡಾಂಗಣ, ಸುಸಜ್ಜಿತ ಪ್ರಯೋಗಾಲಯಗಳು – ಭೌತಶಾಸ್ತ್ರ, ರಸಾಯನಶಾಸ್ತ್ರ, ಸಸ್ಯಶಾಸ್ತ್ರ, ಜೈವಿಕ ತಂತ್ರಜ್ಞಾನ, ಮನಃಶಾಸ್ತ್ರ, ಕಂಪ್ಯೂಟರ್‌ ವಿಜ್ಞಾನದ ಪ್ರಯೋಗಾಲಯಗಳು ಆಧುನಿಕ ರೀತಿಯಲ್ಲಿ ಸುಸಜ್ಜಿತಗೊಂಡಿರುತ್ತವೆ. ಇದರ ಜೊತೆಗೆ ಭಾಷಾ ವಿಭಾಗದಲ್ಲಿ ಆಂಗ್ಲ ಭಾಷಾ ಪ್ರಯೋಗಾಲಯ, ವಾಣಿಜ್ಯ ವಿಭಾಗದಲ್ಲಿ ವ್ಯವಹಾರಿಕ ಪ್ರಯೋಗಾಲಯ ವಿಶಾಲವಾದ ಕೊಠಡಿಗಳು ಸೂಕ್ತ ಸೌಕರ್ಯಗಳು ಇಲ್ಲಿನ ಹೆಗ್ಗಳಿಕೆಗಳಾಗಿವೆ. ನಮ್ಮ ಕಾಲೇಜು ನಮ್ಮ ಹೆಮ್ಮೆ ಡಾ.ಪ್ರೇಮ ಸಿದ್ಧರಾಜು ಪ್ರಾಂಶುಪಾಲರು.